|
|||||||
|
|
|
|||||
|
|
|||||||
TI KAARRUBAK
Sarindaniw ni Gladys M. Menor Honolulu, Hawaii
Adda idi kaarrubak a nagpaidumat' palangguad
No magna kilikilinat' naungap ken ulonat' natangad
Ngem atapko a padak met a nagtaltalaytay iti tambak
Ta dapannat' saplad ken ti mukodna adda gannat' rengngat.
Kinunkunana idi umayda agnaed ditoy Hawai'i
Ditoy kano nga agretiro ti asawana a sarhento ti U.S. Army
Naumada kanon idiay Eurupa — Italy, Pransia, ken Germany
Padasenda kano met ti biag iti kaunasan ken iti kadaratan ti Waikiki..
Ti kinabannuar ni lakayna inna pay irakrakurak
Kameng kano ti bunggoy a napan nangbombat' Iraq
Ngem balsenna nga iparammag a no isu ti agbirakak
Ni Sergeant a lakayna, kasla napak-ulanen a paltat Taiwan.
Gimmatang pay iti balay a dua a kadsaaran
Daanen ngem pinabarona a namimpinsan
Dagiti diding ken atep inna amin sinukatan
Naikalawa pay ti salas ken dagiti kuarto nanayonan.
Idi nalpas ti balayna inna pinabendisionan
Tapno kano pumanaw dagiti di katataoan
Nagsagana pay iti adu a klaset' makmakan
Tapno kano gasat iti dayta a balay aglaplapusanan
Pintas ti balayna saannan a mauray sabali a mangdayaw
Ipangpangasna pay dagiti mueblesna ken tugtugaw
Ginatangna kano amin manipud sabali a pagilian
Tapno masiguradona nga awan kenkuana makaapaw
Ngem ti istrikto ken ungetna nagpaidumat' karo
Awan makasagid ti alikamenna no di pay nagbuggo
Kunana nga amin a lunglunganna kanayon nga isterilisado
Ket ni lakayna saan a nakaungngo no di pay nagsipilio
Gimmatang pay iti baro a kotse a BMW
Ken ar-aritos a nagbitin iti nadumaduma a batbato
Singsingna ken pulseras namurumoran Rubi ken Zafiro
Naglupusen 'toy kaarubak, saanen a langa ti taga-bario
Burburtia kaniak no kasano a nakaurnong iti kinabaknang
Ngem natakuatak met laeng iti naminsan a napanak tiendaan
Nadatngak 'toy kaarrubak a mangtawtawar kumkumsial nga ikan
Ken nangkompra iti nagalas-asan a tultulang.
'Toy kaarrubak natangig a kitkitaen
Baknangna amin a kinabaknang no ar-arigen
Ngem mangsaluad iti salun-atna innan sa met inwalin
Ta iti di nagbayag naidalit metten iti ikamen (este, katre).
Dakam' nga agkakarruba agpugpugtokam' iti sagsagabaenna
Nabasolanna ngata ti nagmenupos wenno nagkanser iti bara?
Ngem idin ta nagbayag ket nauyos ti angesna
Naipalgak a naab-abutan gayam ti bagis ken bitukana.
Piman, kunkunami a nakipagrikna
Uray kasano ti tangsit ken parammag ti kadakam' inna impakita
Dimi latta masbaalan ti ladingitmi ti inna isisina
Ken inay-aymi pay ti nagbanagan ti kabibiagna.
Ta daydi uyong ken rungsot ken dina unay panangipirpirit
Isun sa ti gapu no apay a ni lakayna di unay nagladingit
Awan pay makabulan nagbadon ni Sargeant iti narangrang a t-shirt
Ken daydi ubanan a buokna innan pinatina iti ingget ngisit.
Kalpasan ti maikadua a lenned addan sabali nga agil-ilad
Iti daydi kama nga inal-alukasian ken binisbistianna iti nabayag
Ket dagidi aritos a briliante agbibitindan iti sabali a lapayag
Sabalin, kabsat, ti agikut iti tulbek daydi balayna a napannayag.
Ti nagtungpalan ti biag daydi karrubak diak mailadawan
Ayatna la nga agparammag ken agpammarang bagina inna inim-imutan
Ngem gayam amin a sanikua nga inur-urnongna ken nagrigrigatan
Sabali ti nairanud ken naglak-am — pati ni lakayna dina pay kukuan!
