Daytoy ti imbati ti kalleppas a panagsapata dagiti opisial ken direktor ken pannakapadayaw dagiti kameng ti GUMIL Oahu (GO) gapu kadagiti gapuananda iti panagsuratan a naaramid iti Empress Restaurant, Honolulu, Hawaii idi Nobiembre 19, 1999. Maysa manen a pasken a mangparparangrang latta ti bituen ti Literatura Ilokana iti ballasiw taaw!

Alas dos iti dayta a malem. Natingra ti init iti tangatang. Simrekkami a kameng ti GO iti Empress Restaurant tapno maurnos ken mapapintas ti Reception Hall.

Impatakder a dagus ni Ric Agnes ti wagayway ti Amerika ken ti Filipinas iti makanawan ti entablado. “Mano itan ti bituen ti Amerika?” Adda nagsaludsod.

Minatmatanmi dagiti bituen iti wagayway ti Amerika. “Maikalima pulo pay laeng a bituenna ti Hawaii,” insungbatmi ketdi nga umis-isem.

Naisaruno a naibitin ti baro a logo ti GO iti likudan ti entablado iti granate ken nagallon a telon. Disenio ni Fred A. Quibol. Computer lay-out ni Andy Barroga.

Minatmatanmi ti logo. Ket iti bukodmi a panirigan ken pampanunot, aglayag ti GO iti bukodna a dana ken panawen. Natingra dagiti tallo a maris. Nalabaga, puraw ken asul a maris ti wagayway ti Filipinas ken Amerika. Iti logo, dagiti bituen ti tanda dagiti tallo pulo ket maysa a pundador ti GO. Ti sima ti pana a nakaibutakan ti letra “G” ken “O”, ipakitana kadagiti agnaed iti Amerika ti karit ti napudno ken natan-ok a panggep a mangidur-as ken mangtagiben ti kultura Ilokana ken pagsasao nga Iluko iti ballasiw taaw babaen iti literatura a kas ipalnaad ti lawi a pluma. Ti maris asul a nakaibaskagan ti maris puraw a GUMIL OAHU. 1996, ipakitana ti dignidad, tarnaw ken kinapudno dagiti mannurat a nangbuangay ti gunglo idi 1996.

Mangrugi ngatan nga agandap dagiti bituen idi agsangpet dagiti sangaili. Ket iti reception table, nagtitinnulongan da Namnama Baptista, Lina Barnachea Mercado, ken Lina Longboy ti nagawat kadagiti sangaili. Idinto ta da Gladys M. Menor ken Flory Fermin ti para iyukkor iti lei kadagiti rebbengna a maukkoran a sangaili. Da met Gloria Yoro, Aurora Ponce, Cherry Quibol, Elvie Adviento, Paul Taong ken Philip Blanco ti nagitulnog kadagiti tugtugawda.

Asino ti nagidonar kadagiti napipintas a lei? Ti Lina B. Flowers a kukua ni Lina Barnachea Mercado! Much mahalo, Lina!

Nagsasaruno a simmangpet da presidente ti UFCH Don Alvarez ken Linda Alvarez a kaingungotna, dati a presidente ti OFCC Ben Cabreros, kameng ti OFCC board Louie Funtanilla, kameng ti OFCC board ken presidente ti INCAT Alumni Assn Larry Ramirez, presidente ti Annak ti Sinait iti Hawaii Manuel Cabacungan, presidente ti Magsingal Assn of Hawaii Lynne Gutierrez, presidente ti Sinait Alumni Larry Peralta, presidente ti Isabela Association of Hawaii Mona Ilar ken Jerry Ilar a kaingungotna, presidente ti Bani Pangasinan Domingo Butardo, dati a presidente ti UFCH Bert Ugalino ken pamiliana.

Simmaruno a simmangpet da dati a presidente ti Filipino Chamber of Commerce Cecilia Marhevka, Mrs. Sinait Alumni Maui Lety Yoro Basuel, presidente ti Filipino Women’s Civic Club Cervalina Longboy, presidente ti Sarrat Assn of Hawaii Dwayne Bueno, presidente ti FLAG Ted Saribay, presidente ti San Vicente Assn of Hawaii Loreto Rubianes, dati a presidente ti OFCC Gerry Rojo, Police Commissioner Melga Gendrano ti City & County of Honolulu, Miss Teen Isabela Hawaii Mary Grace Matias, Holy Cross Church Rev. Tancredo Pastores, Saint Paul’s Church Constantino Dela Cruz, ken Aloha Tours & Travel Rose Galanto ken Joe Pacquing, ken dadduma pay.

Adda met da Cleo Bala Casino a sekretaria ti OFCC ken Franco Casino a kaingungotna, ken Andrea Mendoza a nangibagi ti Gumil Hawaii. Saan a nakaumay ni Manang Pacita Saludes ta adda di napakpakadaan a napananna.

Iti saan a mabayag, simmangpet ti naisangsangayan a sangaili, ni Dionisio S. Bulong nga Editor-in-Chief ti Bannawag. Maysa kadagiti sadiri ti Literatura Ilokana. Sinabat ni Gladys M. Menor ket inyukkorna ti napusaksak a lei! Inabrasa ken immalditna iti Aloha kiss. Kultura a naipaugalin kadagiti amin a puli iti Hawaii. Nakidinnakulap kadagiti adu a pangpangulo iti Filipino Community ken opisiales iti Estado ti Hawaii a dimmar-ay. Nakidinnakulapkami met.

Maipalagip nga adda idi da Bulong ken Duque, ti Managing Editor ti Liwayway Magazine idi mabuangay ti GO idi Agosto 13, 1996 iti Filipino Express Restaurant iti Waipahu, Hawaii. Nangrugi ti programa!

“ALOOOHAAAAA!” Inkablaaw ti Mistress of Ceremonies, ni dati a Managing Editor ti Fil-Am Courier ken radio announcer, Marlene R. Manzano. “Good evening, ladies and gentlemen, and welcome to the Gumil Oahu inaugural banquet and presentation of award.” Timmakder amin a tattao ket naipatayab ti nailian a kanta ti Filipinas ken Amerika nga indauluan ni Namnama Baptista. Naisaruno ti kararag ni Rev. Fr. Randolph V. N. Albano iti Saint Paul Church iti Honolulu.

Ni Maggie P. Domingo, ti General Chairwoman ti programa ken maysa kadagiti direktor ti GO ti nangipeksa ti pormal a welcome address. Ket kalpa-sanna, naidasar ti Five Courses Dinner.

Kabayatan iti pangrabii, nagkanta ti napintas a balasitang Aileen Peralta. Impakita ni Perry Ugalino ti maysa a sala Filipiniana idinto a naginiin ti nalap-it a bagi ni Amy a kabsatna a naghula. Nagdeklaim met ni Lety Yoro Basuel idinto ta “orasion” ti impakita ni Perlita Yoro Fernandez a kasinginna. Saan met a naudi ti Ballroom Dance Unlimited a nangipabuya ti laingda a nagsala kadagiti kabaruanan a ballroom dance craze. Makapikapik-rikna ti panagdaniw ni FTP, Sr. Ti Bukanegan da Letty Pascua ken Flory Fermin ti nangray-aw iti tallaong ket uray la a makapugpugso dagiti mangmangan nga agkatkatawa. Saan nga agsarday ti makatitileng a sipsipat manipud rugi agingga a nalpas ti Bukanegan. Ni Art Ignacio ti moderator. Bukanegan a bunga ti pampanunot ni Don Carlos Palanca Memorial awardee, Ric Agnes.

Maysa pay a nangray-aw dagiti tao ti panagsalamangka ti agsangapulo ket maysa a tawenna nga anak da Mr. ken Mrs. Gerry Rojo, the amazing magician Gerald Rupert Rojo II.

Nadanon ti pannakaiyam-ammo ti naisangsangayan a sangaili. Ni GO sekretary Gladys M. Menor ti nangiyam-ammo kenkuana. Umuna nga inagapadna ti nagtaudanna, sa dagiti napasaranna a rigat kabayatan ti panagadalna. Kalpasanna, imbinsabinsana dagiti nagapuananna a nakatulong ti ibabaknang iti literatura Ilokana ken Tagalog ken dagiti nagun-odna a pammadayaw iti panagsuratan. Ti 1999 UMPIL AWARD ti kaudian a naawatna a pammadayaw.

Maysa nga edukador ken maysa met laeng a mannurat ti asawana, ni sigud nga Eden L. Cachola. Dua ti annakda a babbai. Maysa ti doktor ken maysa ti mangal-ala iti kina-abogasia.

Iti panagsarita ni Bulong, umuna nga inagapadna ti kinapudno iti pamilia. “Iti dalan a nagnaak nga immay iti Hawaii, isunto met laeng ti dalanko nga agsubli iti Filipinas ken iti pamiliak.”

Maikadua nga inagapadna ti nakaikamanganna: Ti ladawanna a buklenna kadakuada. Maikatlo ti Literatura Ilokana a matagiben ken mapabaknang uray pay iti ballasiw taaw. Ket ti GO ti maysa a rangtay wenno instrumento a mangtun-oy iti daytoy a panggep.Impeksana met iti inna panagyaman iti GO iti kaaddana manen iti Hawaii. Ket iti daytoy a darikmat, kinunkunami met: Agyamankami, Apo Editor, ta pinatgam ti awismi. Ket sika ti nangpadaeg ti ladawan ti GO ken nangpatibker kadakami a makibinnulig nga agsangal ken agkutkot kadagiti saan pay laeng a natakuatan a rimat ti Literatura Ilokana. Kalpasan iti panagsaritana, naawagan dagiti opisial ken direktor tapno agsapatada iti sanguananna.

Naisaruno a naawagan dagiti kameng ti GO a nakagun-od iti pammadayaw iti panagsuratan. Ric A. Agnes, Art T. Tolentino, ken Francis T. Ponce, Sr.: Most Outstanding Writer 1999. Andy Barroga, Gladys M. Menor, Lina B. Mercado, Fred A. Quibol, Felipe Blanco ken Flory Fermin: Outstanding Writer. Special Recognition Award, Marlene R. Manzano; Posthumous Award, Mike P. Ulibas.

Inawat met ni Amado I. Yoro, presidente ti GO ti special recognition plaque gapu iti naidumduma a panangidaulona ti gunglo. Da Dra. Estrella Pada Taong ken Letty Pascua ti chairwomen iti Award.

Ket impeksa ti GO ti naimpapusuan a panagyamanna kadagiti amin a nagidonar iti plake. May God Bless you all!

Iti panagsarita ni Amado Yoro, impaganetgetna ti panagtultuloy koma ti gunglo a mangsaranget kadagiti pannubok ken karit ti umadanin a milenium. Kinunana: “Saan la koma a panagsurat wenno panangibin kadagiti agpanggep nga agsurat ti aramiden ti gunglo no di ket makitinnulong iti FilCom Center, Aloha Mabuhay Committee and Hawaii Millennium Commission, Sirmata 2004, Minority Organ Tissue Transplant Education Program (MOTTEP), United Filipino Council of Hawaii (UFCH) ken Oahu Filipino Community Council (OFCC), Adopt-a-Highway Clean-up Program, Make America Beautiful, Feed the Hungry and the Homeless, Weed and Seed Graffiti Paint out, ken ti Filipino Centennial Celebration inton Tawen 2006 tapno dumur-as ken maam-ammo met ni Filipino iti komunidad. Dagitoy a ganuat, maysa met a wagas a pangtagiben ti kultura ken literatura. Ket amangan no daytoy to pay ti dalan a mangbukel ti Writers Int’l Network wenno WIN."

Iti naipatulod a mensahe ni Gobernador Benjamin J. Cayetano, insuratna iti maysa a pasetna: “The association of Iloko Writers in Oahu has become an important voice for Filipino writers in Hawaii. I am pleased to recognize Gumil Oahu’s president, Amado I. Yoro, under whose leadership the association is now poised to grow even stronger in the next century.”

Iti met maysa a paset ti mensahe iti Consul General ti Filipinas iti Hawaii Minerva Jean A. Falcon, kinunana: “ I commend Gumil Oahu for its mission of promoting a standard of excellence among its Ilokano writers through literary education, providing forums and workshops for honing their writing skills. This effort addresses the need to preserve the ethnicity of the Iloko language which has held Ilokanos together as the dominant Filipino ethnic group in Hawaii.”

Immay indanon ni Adonis Vergel ti mensahe ni Honolulu Mayor Jeremy Harris. “The ability to communicate, especially through the written word, is a requirement of leadership and part of the foundation of great civilizations. The written word can inform, persuade and convey the full range of human emotion. The skill to express ideas in writing is an individual asset and a benefit to society as a whole…” Daytoy met ti bugas ti kablaawna.

Dagiti nagsapata nga opisial ti 1999-2001: Amado I. Yoro, president; Ric A. Agnes, Internal VP; Andy Barroga, External VP; Gladys Menor, Recording Secretary; Lina B. Mercado, Corresponding Secretary; Flory Fermin, Treasurer; Namnama Baptista, Asst. Treasurer; Dra. Estrella P. Taong, Auditor; Marlene R. Manzano, PRO; Felipe Blanco ken Paul Taong, Security Officers.

Direktors: Maggie Domingo, Larry Fiesta, Leticia R. Pascua, Tony L. Sagayadoro, Fred A. Quibol, ken Francis T. Ponce, Sr.

Mamagbaga: Rep. Felipe P. Abinsay, Jr., Rev. Joe Lazo, Rev. Randy Albano, Rev. Tancredo Pastores, Vic Dalere, Flor Martinez, Gerry Rojo, Leonora Albayalde, ken Mona Ilar.

Kalpasan ti panangrikep a panagyaman ni Dra. Estrella Pada Taong, immaweng ti Domie Borillo Sounds. “La Comparcita!” Cha Cha! Ket addaytan dagiti ballroom dancers a nangipakitaanda iti laingda a sumala!

Nagsisinnublatan dagiti “GO Angels” nga insala ni Apo Editor ti Bannawag. Agkaragilap met dagiti kamera iti sanguanan ken sikiganna.

Rabiin idi malpas ti ragragsak!

Manen, agyaman ti Gumil Oahu kadagiti amin a lei ken plaque donors, dagiti sponsor ken advertiser, ken kadagiti amin a nangpadaeg ken nakibinnulig iti daytoy a pasken. Dispensarenyo koma dagiti nagkuranganna. Congrats kadagiti amin nga awardee! More power kadagiti baro nga opisial ken direktor. Kasta met kadagiti amin kameng! Aloha ken Mabuhay kadakayo amin! Agbiag koma ti GUMIL Oahu! God Bless Amerika! God Bless the Philippines!

DAGITI PLAQUE DONOR: Mr. & Mrs. Buddy ken Melga Gendrano, Mrs. Flora Galla Montagna, Atty. Victor Agmata, Mr. & Mrs. Jerry ken Mona Ilar, Mr. & Mrs. Placido Paredes, Mr. & Mrs. Larry ken Abbie Peralta, Mr. & Mrs. Randy ken Madeline Tolentino, Mr. Arsenio Galicia, Mrs. Namnama Baptista, Mr. Elias I. Yoro, Mr. & Mrs. Gus ken Lina Longboy. Pinnfund: Louie Borja, Mr.& Mrs. Fred ken Vivian Santiago, ken Mr. & Mrs. David William.