Tunggal aldaw, ditoy Puuku Mauka

manipud iti beranda maimatangak

dagiti agampayag a sumanglad

nga eroplano manipud daya.

Tunggal aldaw, no agpakadan ti init

im-imtuodek iti nawada a langit

no ania nga eroplano ti nagrubuat

manipud Calayab.

Tunggal aldaw, sakbay ti sardam

umagibas ti lagip nga iti maysa

a bigat ti Mayo insangladnak

ti eroplano ditoy Oahu:

balasitangak idi immayak

nakidenna iti amak

nga immay met nakigasanggasat

iti daytoy daga a naaplagan iti unas.

Tunggal aldaw, iti parbangon

nga awanen arimekmek dagiti eroplano

salsaludsudek iti bagik

no apay nga addaak ditoy, ken

no apay nga immay ditoy ti amak

idinto idiay Calayab naaplagan met

dagiti bangkag ken paratong

iti nawawasnay nga unas.

Tunggal aldaw, iti kaltaang ti rabii

padpadaanak nga iti maysa

a bigat ilayagnak manen

ti eroplano nga isubli

idiay ing-ingungotek a Calayab.